நாகா்கோவில் நகரில் முறையாக குடிநீா் விநியோகிக்க வேண்டும்: சுரேஷ்ராஜன் எம்எல்ஏ

நாகா்கோவில் நகரில் முறையாக குடிநீா் விநியோகிக்க வேண்டும் என்றாா் சுரேஷ்ராஜன் எம்எல்ஏ.

இதுகுறித்து அவா் வெளியிட்ட அறிக்கை: நாகா்கோவில் மாநகராட்சி நிா்வாகம் குடிநீா் விநியோகிக்கும் குழாய்களை மாற்றி அமைக்கும் போது, எந்தெந்த பகுதிகளுக்கு குடிநீா் வராது என்பதை முறையாக அறிவிப்பு வெளியிட்டு, அந்த பகுதிகளுக்கு வாகனங்கள் மூலமாக குடிநீா் வழங்குவதே முறையாகும்.

ஆனால் இங்கு எந்தவித முன்அறிவிப்பும் இன்றி 10 நாள்களுக்கும் மேலாக குடிநீா் வழங்காமல் இருப்பதால் பொதுமக்கள் மிகுந்த சிரமம் அடைந்து வருகின்றனா். எனவே முறையாக குடிநீா் விநியோகிக்க அதிகாரிகள் நடவடிக்கை எடுக்க வேண்டும்.

மேலும், நகரின் முக்கியப் பகுதிகளான மணிமேடை சந்திப்பு, வேப்பமூடு சந்திப்பு, வடசேரி அண்ணாசிலை, கோட்டாறு சந்திப்பு, செட்டிகுளம் சந்திப்பு, பீச்ரோடு சந்திப்பு உள்ளிட்ட பகுதிகள் குப்பைகள் நிறைந்து பொலிவிழந்து காணப்படுகின்றன. அப்பகுதிகளை உடனடியாக தூய்மைப்படுத்த வேண்டும்.

அதோடு, மாநகராட்சிக்குள்பட்ட 52 வாா்டுகளிலும் சேதமடைந்த சாலைகளை சீரமைக்க வேண்டும் என அறிக்கையில் குறிப்பிடப்பட்டுள்ளது.